کاشر غزل تٔہ أمچی تنقید ''طارق احمد طارق

غزل
کھساں نہء واو رزن، نے ملر چھ نظرِ گژھاں
گوتن گمتی تہء فکر مند وولر چھ نظر گژھاں

یمن أچھن زِ دپاں چھکھ خلا چھ قبضہء کرتھ
تمن اندر میہ مگر بحرو بر چھ نظرِ گژھاں

یُتھوے شکار گژھاں چھُس بہء انہِ گٹیک تہء تیتھوے
وجود اندر پیاپے سحر چھ نظر گژھاں

میہ کیازِ پان پنن چھُم وٹسی گمُت باساں
میہ کیازِ قدمہء قدمہء جأدی گر چھ نظرِ گژھاں

غزلہ پیٹھ تنقید
تنقید نگار  طارق احمد طارق   ۱۸ فروری ۲۰۱۷

"میانی کتھ بوز اسمانٔہ پِلن والِہ ٹھٔہر"

یہ  چھ واقعی اکھ مأر مٔنز غزل. ردیف چھ کافی خوبصورت.پریتھ شار چھُ منفرد.أخری شار چھُس ذیادے پہن .

یتھ غزلہ ہند پس منظر چھ
کہنہ کتھۂ سونچنس پیٹھ مجبور کراں.
۱.  سہ گو یہ زِ مشکل بحر ہند انتخاب کرتھ شاعری لیکھٔنی چھ شاعرس بھرتی ہندی الفاظ استعمال کرنس مجبور کراں.
۲.شعری اصنعاتن ہند استعمال چھ شاعری حسن بخشان مگر اکٔی صنعت شعر پتہ شعرٔ دھراؤنی چھٔ شاعرس کُن اُنگٔج تلنس مجبور کراں.ازچہ غزلہِ ہندیو پانژو شعرو منز چھ ژورن منز پیاپے "صنعت تضاد "ورتاونہ آمٔژ.
۳.اکثر استعارٔ  چھ کاشرس محاورس کھأتر ووپر باسان.
"ولر چھ نظر گژھاں" ولرس ہیوی کاتیاہ جیٔل چھ کشیر منز یمن "ولر"استعارہ احاطہ کرِ.
أچھن خلاء قبضہ کرن کیاہ گو. یہ محاورٔ گو کاشرس لیٔتھی کھور کرُن
"قدمہ قدمہ" تہ چھنہ کاشر محاورٔ.شاید چھ شاعر اردو پاٹھی سوچیتھ شار تھراں اوسمت.
أخری شار چھُ جان.اتھ منز چھ فی البدیہ کیفت خوبصورت تہ بےشونگ آیہ قلمٔچی زیوِ کھٔژمژ.حسینؑ تہ شمر چھٔ پریتھ دورس منز معرکہ آرائی منز آؤر رودمٔتی.شاعرن چھ پننہ دورچی امہ حوالہ جان ترجمانی کٔرمٔژ.
زینون =
سانین خأمین ہنز نشاندہی کرن وول چھُنہ دوہی دشمنئ آسان ,نہ چھٔ بے حد تأریف کرن وول ہمیشہ دوست آسان.
...........‌.............................................................
ضمنی سوالن ہند جواب.

شاھد صاب سلام۔
مہ چھ سکھ خوشی زِ توہہ پُرو میون تجزیہ۔ضروری چھنہ ز میانی کتھ آسہ حرف  أخر۔ یمہ چھ محص میانی تاثرات۔

توہہ یمن کتھن کن میون زؤن پھیروتمہ چھ معنی خیز۔
۱۔ اگر گوڈنکس شارس منز زمیندار سندی ڈوریک ولر معنی نمو ،شعرچٔی نٔویت کیاہ بنہ۔

۲۔مشکل بحرِ لأرتھ روزنہ سأتی چھ پریتھ مصرس لفظ"چھ " ڈیکس متھنہ آمت۔
تریمس شارس منز الفاظ "بہ"  "تٔہ"  "تیتھوے"

ژورم شارس منز  "چھم"

۳۔دون مصرن منز الفاظن ہنز ژأر أمی آیہ کرٔنی زِ کہنہ الفاظ آسن پانہ وأنی متضاد اتھ چھ صنعت تضاد وناں۔

واو رزن کھسن   بمقابل    گوتن گژھن
خلا         بمقابل        بحر وبر
انہ گوٹ     بمقابل    سحر
حسین       بمقابل    شمر

۴۔أچھن خلا قبضہ کرنک یوس معنی توہہ وونو میانہ خاطر چھ سُہ نوو اضافہ۔
قدمہ قدمہ اگر کاشر محاورٔ چھُ یہ دٔیتو جملس منز استعمال کرتھ دیو بٔتہ ہیچھ ہا۔

ووچھنہ شاھد صاب میون جرح دلس لگیوو۔معافی گژیم دِنی۔
شاھد صابن
جواب.
طارق صآب فرصتھا آسنی تہ توہہہ ستی ملاقاتک پروگراما آسن ۔ باخدا خوب گزرتی جو مل بیٹھتے دیوانے دو ۔
خیر ۔ توقع تھاوُن چُھنہ گنہ  ۔ بلکہ سپد کنہ دوہ اتفاقیہ ملاقات ۔ انشاءاللہ یڈ برتھ کرو کتھا باتھا ۔ یتھ لوکٹس کینواسس پیٹھ چھنہ تصویر اصل پآٹھی چشمن ویان ۔