ڈاکٹر رفیق مسعودی "کاشرِ شاعری ہنز اکھ جاندار تہ شاندار آواز"- ازقلم: طارق احمد طارق بہرام پورہ رفیع آباد

ڈاکٹر رفیق مسعودی
کاشرِ شاعری ہنز اکھ جاندار تہ شاندار آواز

tariq Ahmad Tariq

مضمون نگار: طارق احمد طارق

راؔبرٹ فرادٹ چھ ونان ز یلہ تہ زانہہ جزبس تصوّر تہ تصوّرس الفاظ میسر یئن شاعری چھ تھنہ پیوان. تہندوی دوپ چھ ز شاعر چھنہ شاعرانہ حقیقژ بدِی کڑان بلکہ چھ تمہ شاعرانہ حقیقژ بارسس انان. سجمنڈ فرائڈ چھ ونان ز شاعر چھ تمی گاٹھئچی تریش چیوان یوس گاٹھ نہ ازتام سائنسدانو دریافتے ہیوک کرتھ. ڈاکٹر رفیق مسعودی صآبو چھ آمی گاٹھچ تریش چمئژ. تمن چھ جزبن تہ تصوّرن ہنزِ بوج وٹھ گوڈ پیٹھی بدس آسمژ، وں گو الفاظن سآتی پنہ نین جزباتن ہند رشتہ پزرووکھ ہنا ژیری پہن.  ۲۰۱۲ء  یس منز آیہ ڈاکٹر رفیق مسعودی صآبئنی شعری تخلیق  "پنن دود پنئنی دگ"  منظر عامس پیٹھ. یہ کتاب چھ کآشرین نثری نظمن ہنداکھ مآرموند پوشہ گوند. پئتمیو الہ پلہ ترہ ہو '۳۰' وہریو پیٹھ یوس کشیر ہندس معاشرتس، معیشتس، ثقافتس تہ سماجی قدرن منز تناو ڈاکٹر مسعودی صابس لبنہ آو تمیوک سوری کرب دراو چھیکرس شعری پیرایس منز ووند بھاوتھ کرنہ سآتی نون. ڈاکٹر صآبنی یہ شعر سنبرن چھ پزنہ پآٹھی راومژن انسانی تہ سماجی قدرن ہند مرثیہ تہ ماتم.
ڈاکٹر رفیق مسعودی صابس باسیو ز پنئن جزبات یسلہ پآٹھی بغیر کنہ ملاوٹہ باونہ بابتھ روز تمن بابت نثری نظمہ ہند قالب ذیادہ مؤثر، لہذا رٔئٹی نہ تمو سہ روش یوس کم و بیش کشیر ہندی سری شاعر پسند کران چھ. میون اشارہ چھ غزل لیکھنچ روایژِ بور نہ ڈاکٹر صابن زاہنہہ تہِ مآل، نے لیچھک نظم معریٰ، یا پابند نظمہ. ڈاکٹر مسعودی صآبس نزدیک چھ پریتھ حقیقژ پتی کنی اکھ جمالیاتی فضاء کینواس شیرتھ روزان تہ تخلیق کار چھنہ اتھ رنگ برنس منز کانہہ تہ کنجوسی کران. 
میآنس مطالعس منز چھ وکہ نس ڈاکٹر رفیق مسعودی صآبنۂ کل چھ نظمہ یہندی عنوان چھ‍−
۱.  اتھہ چھ طلسمی آسان
2. پردیسی
3. جآدی گر ٱنہ
4. ترقّی
5. حمل
6. لو ٕ‎‍
یمہ تمام عنوانات چھ باس دوان زِ موضوعات چھ شاعرس پنہ نس اوند پکس منز درٱنٹھ گژھان. تمن چھ کوس تاں دگ سینس ووتھان تہ تمہ چھ بےبس گژھتھ قلمس زیر دوان.
اتھہ چھ طلسمی آسان. نظمہ منز چھ شاعرس انسانئ اتھن ہندی دٔسی شاہکار تُھر نہ ینک جزبۂ وفور لبان. سہ چھ حٱرتن پیوان ز قدرتن کوتاہ کمالا چھ انسٱنی اتھن دیوتمت. شٱعرس چھنہ موقعہ ونہ نس ز تاج محل، ہوائی جہاز، کمپیوٹر ہیو چیز بنٱوی انسٱنی اتھو تہ ہووک کمال بلکہ جمالیاتی طور کینہہ علامژٔ تھرتھ چھ شاعر خامۂ سرائی کران. ؎
کانہہ اتھہ روڑِ پھلین
لعل بناوان
کانہہ اتھہ ژئنہِ پھلین
موختکی پٱٹھی گہناوان

شاعرس چھ اتھن ہنزن کرامژن پیٹھ ایمانِ صادق توے چھ سُہ وجدٱنى أچھو اتھن ہنزن کرامژن ہند لطف تلان.

نظم "پردیسی" منز چھ شاعرس زمانچہ ترقی ہندس پس منظرس منز لتہ مونجہ گٱمژ انسٱنی قدرٔ درٱنٹھ گژھان تہ تس چھ دلس دگ ووتھان. تس چھ باس لگان زِ ترقی ہنزی ہیرِ کھسان کھسان چھ موجودٔ انسانس أچھن ہند آب موکلیومت. بہارى دٔسل بطور علامت بنٱوتھ چھ شاعر کٱشر تہذیب و ثقافت کِس أمس معمارس کوچین گتھ کرناوان تہ رشتن ہند شُٹھنیار چھ أمس اکسی امیدِ لٱرتھ تھاوان سُہ گیہ سُہ بُڈ مٱج یَس ونتہ زمانہ چہِ ترقی ہند ہوا لگنے اوس.
؎کتھہٕ کنہ ونہ ہس
زِ بس تسی بُڈ ماجہ اوس
یتھ بستی مبز
آبہ وولر چشمن منز

نظم "جٱدی گر ٱنۂ" چھ شعری کردارس انسٱنی بتھین ہنز حقیقت فکرِ تاران. شعری کردارس چھنہ ٱنہ منزی پنن بُتھ درٱنٹھ گژھان. سہ چھ کآتیاہ خوشونی بتھین آمی ٱنہ منزی انہار بدلاوان وچھان. تمس چھ ژینہ ون لگان زِ انسانن ہنزی دوپھن دلآزی اگر نئنی کڈئنی چھ تلہ چھ اِتھین  ٱنن ہند وجود ضروری بناں یمو منزی وچھتھ بُتھی بے نقاب گژھان آسن.

؎کُنہ کُنہ ٱنہ منز
پنن بتھ اچانک غٱب گژھان
تۂ
ہتہ بدی بتھی لبنہ یوان
پتہ، اکہ اکہ تمن بتھین پیٹھ
راکھشس سند بُتھ مرنہ یوان
کم خوشونی بُتھی چھ بد روح باسان

"ترقّی" ناوچہ نظمِ منز چھ ترقی ہنزِ ویژھنے بابت زبان بطور معیار گنزراونہ آمژ. گھریکی شُری کیاہ زُری چھ ترقی ہنزِ ہیرِ کھسی کھسی انگریزی تہ اردو زبانن لول برنہِ لئگمتی تہ شاعرس چھ احساس گنان زِتمہ سندی پآٹھی چھ گھرس منز کٱشر زبان تہ وں بُڈیامژ.

بیاکھ اکھ نظم چھ "حمل". حمل چھ اکہِ نالُک ناو گنزراونہ آمت یُس شاعرس پنہ نہ پرگنچہِ پراپر جایی ہند احساس ووتلاوان چھ. شاعر چھ اصلاً علاقہ حمل کوی روزن وول تہ تم چھ لوکچارس امی نالُک نپہ نپہ کرون آب یسلہ پٱٹھی چھوو مت تہ ایہندی زراعتکِس بقائس خاطر چھ یہ نالہ سٹھاہ ضروری اوسمت. شاعر چھ امی نالہ چہ کسمپرسی ہندی ویداکھ دوان. تس چھ نالس منز صرف پالتھینن ہندی انبار درآنٹھ گژھان. یس یہ سہلابی دوہن اہندین کھہن مبز چھکران روزان چھ.

؎کُس ونہ تس
اسہ کتھ لگہ ژھیونمت پالتھین بکار
اسہ دتہ سُہ روپھ ہیو آب
سُہ امریتھ واپس

نظم "لوٕ" منزچھ شاعرن شبنمک موضوع ژآرتھ یہ جزبہ ووتلومت زِ صبحس نپہ نپہ کرون یہ موختہ کِتھہ چھ اختابہ زٔژ ڈیشتھی فنا سپدان تہ یہ باس دوان ز خوبصورت چیزن ہنٔز وآنس کآژاہ موخصر چھ آسان.
خوبصورت چیزن نسبت چھنہ شاعر  بالکل تہ مویوس بلکہ چھ سہ محسوس کران ز خوبصورت چیزن ہند وجود چھ پنہ نس آگرس منز ہر ہمیشہ پوشہ ون آسان. ایتھ چیز چھ یتھ دنیاہس منز اکھ پرتو ترٱیتھ واپس ملک عدم گژھان تہ نورکاملک مستقل حصّہ بنان.

کلہم پٱٹھی چھ ڈاکٹر رفیق مسعودی صآب تمی مسلکک شاعر یمن موجودہ شہرآشوبن اندری ژئس چھ تھومت کرتھ. شاعرس چھ پانس اندی پکی زمین تنگ باسان. تس چھنہ لوکن ہندی وطیرٔ بدلاونس پیٹھ کانہہ تہ دسہ گاہ توے چھ ویداکھ دوان زِ اسہ کیاہ سپد. اسہ کیاز پُھٹرٱو قدرتکی اصول تہ کیاز مشروو مقصد حیات. شاعرس چھ تہذیبی، ثقافتی تہ لسانی قدرن ہنزن پامالین ہند شدتہ سان ملال. یہ سوری چھ شاعرن پنہ نس باوژبلس منز ٱنتھ لوکھ خاب غفلت نِش بیدار کرنچی کوشش کرمژ.

ڈاکٹر رفیق مسعودی صابُن اسلوب چھ نِرل تہ صاف. الفاظن ہنز ژٱر چھ واریاہ سونچیتھ سمجتھ کران. پنئنی احساسات چھ متاثر کن الفاظن ہندی ذریعہ قارئینن تام واتہ ناونک بتُر تہ بانہ تھاوان. تمام نظمہ چھ سیٹھاہ خوبصورت تہ پرنی لایکھ. میہ چھ یقین ز کاشرین نظمن پیٹھ یلہ یلہ تہ کتھ سپداں روزِ  ڈاکٹر رفیق مسعودی صابنہی کتاب "پنن دود پنئنی دگ " ناو کتاب ییہ ضرور بطور ریفرنس پیش کرنہ.

طارق احمد طارق
بہرام پورہ رفیع آباد