Firaq Gorakhpuri poem آنکھوں میں جو بات ہوگئی ہے

https://youtu.be/GfUKZEQ4USM

Ali Shaida Poetry

 *غزل*
پانس قریب  تاپہ  ژنجن  منز  اناں  مے  ناگ
آبس ولِتھ چھ ہاڑہ تپل تن تھواں  مے ناگ
بنجر  ؤڈر  سراب  سیکستان   تریشہ   ہتئ
میئ کُن گنڈتھ مدعأے زِ چشمن وزاں مے ناگ
ہجرکئ  پڑاو  دودسہ سفر  چون  دردہ گام
وصلک خیال زنتہ پدِس پود  پکاں مے ناگ
بعضے  کنن  گژھان  تہِ    ہیمالہ  ہُند    پَکُن
کتھ تام شایہ أندرہ چھُ شاید بساں مے ناگ
دوہ تارہ ہیتھ ژہاں چُھ أچھن اوش تہِ شامہ پتئ
کیا سا ژہ نأگراے چُھکھا یی پرژھاں مے ناگ
کوم چھس سیکلئ سرایہ کراں یام گریشمہ کألئ
شراوُن موچھین سمان پدیو تلئ پھٹاں مے ناگ
شیداّ  یہ  کُس  پڑاو  پدین  نالہ   موت کرِتھ
یا   چُھس  بہ  دأئران  نتے   دأئراں  مے ناگ
...................................
 کونگی.....
ہتے میأنئ کونگی
خبر یاد چھیا
بجہ عیز ہند سُہ عرفہ
ریش مالنہ ییلہ دپٹس شرنہ فلئ گنجییتھ
آرہ پتھِ بٹھئ بٹھئ آسئ اکھ اکس آبس منز وچھان تہ رہلئ وٹھ سریہہ ناوان
ہتے پوشہ مالئ  رندہ ہے ہیچھ نووتھ
سزہ ٹورین  گندُن
شابش ہے چُھے....
رسل میرس چھے دارہ دشئ گنڈتھے
میرہ مأدانہ چیایہ ناگہ پوکھرہ پیٹھ
دوژھو دوژھو تریش
لسر بالس پیٹھ دژاو تھکھ
ژہ أسکھ چنہ گنڈ تہ پولی گامن مُدعأے گنڈتھ
بہ اوسس شاہباد پرگنس چانئ پوت ژھاے ؤنراوان
ژے آسی روخ پھلئ پھلئ یواں
مے آسہ وٹھن مانچھ تلرہ پھٹاں
تم سأری تصویر چھ مے از تہ دردہ أچھن ہندین صوندقن اندر تہہ تہہ 
کلیات رسل میرس منز مورہ تیرہ زنتہ رژھرتھ.......
کونگی.. ژے ما یاد
گوڈہ کتہ آسی یاد
ویرناگہ دژأے نا ذاگیہ ناگس ستھ گتھ
اونگجہ ٹینڈین پیٹھ گنزرأوتھ
سوداگارس ہیژأے نا بنگرہ...
نہ ....مستہ کلِپہ
بنگرہ انیأمے مینا بازارہ.......دِلہِ
تم آسہ سونہرئ..
تہ نپہ نپہ کرہ وُن چاندہ ہند پازیب
چاندنی چوکچ سرمہ سرنڈ تہ آگرہ ہک
زنہ گاشس گورمت لوکٹ  تاج محل 
تم مشک ملتھ لوکچہ لوکچہ رُمالہ
تم آسن ژے راورأمتئ.....مے چھ پے
ژہ أسکھ نہ میأنئ چیز رژھرتھ تھاوان
پرژھہے تہ وناان أسکھ
"تم چھم صوندقس منز
تمی دوہ ہاوے ییمہ دوہ یکھ تہ ڈولہ منز
نیہ ہم"
ڈولئ وچھأے اسہ مارتنڈہ گژھ وُن اکس پرانہ کُچھِ پیٹھ..لژھہ کھیمژ
خبر پیو یہ یاد....کتہ....!
وونمے نا ژے اوسے مشرپھ
ناگس منز آسہ رنگ برنگئ گاڈہ
زنتہ سأنس دوددس پھریکھ کھالاں
چُھے یاد ییلہ مٹن وڈر دَو کھاجییئ
....مان لاجیئ
تہ تریلہ باغس منز دژوو  تَم
ژہ أسکھ باغس منز یتہ ہوت کران
تہ بہ اوسس گنگراوان کیا ہتام...
زنتہ ....پیرئ تراوان کوت گژھکھ کوستورئے
آرہ پتھِ اوس آب شٹھیومت
ناگ ڈنڈی اوس جوگئ شہن ہندئ شِنہ تھوسی جولہ بران
لکھ أسئ اچھ ول باغس منز عرفچہ موچھِ موران 
ناگہ راد اوس شرونراے کراں
بونین تل أسئ شہلئ  مس نندرہ
شرین ہند چرگیُش اوس ون یارین روو کرناوان..
یارہ کن آسئ أسئ اسئ وسئ پیوان
سہ یارہ کن ما راورووتھ یس مے وانکن منز ولتھ تھایووے
تمن وانکن ما مژرتھ گنڈھ 
 لچھ وانکہ آسمے وجمژہ
پچھ اوسم لوگمت......
ژے آسی اتھ ہوندران تہ بہ اوس سے
شہن ہند وشنیر اونگجن ملان
پاد ہے لوسم نوگام پیٹھ ژوگام تاں
ہاڑنئ دوہ ہے درم چانہ لولرے
یاون سریہ ہے پیوم دزتھ نلہ ناگس منز
ژھر ہے گوم وأنجہ تل
کونگی ..ہتے میأنئ کونگی
ژے ما یاد........کتہِ سُہ کتِہ
مے نے پانس وونئ یاد کینہہ
بس یِتُے......
زِہ کھنہ بل گاٹھس پیٹھ یوس کاٹھ کأنی سونبرتھ تھایأے
سُہ دز......   تہ سور نیو واون
ویتھِ کُس دیہِ ذول
برنگی پھٹ سہلابس تہ چنگی گو ساز ہیتھ ییرہ
سور کُس انہ موچھن منز
بہ نیر ہا سُے سور ساس ملِتھ چانہ آنگنئ
کونگی..ہتے میأنئ کونگی...
ژہ ما نیکھ کارتِککئ شریزن
ستھ ون پتھ  ورغلاوتھ
عجب ملکنئ گلریز ما لئج گردابس
کنہ کونگہ وڈر تروو یوسفن ڈاکہ
صحرأوئ خیمن منز چھ دم پھٹئ آلو گژھان
کونگی..ہے میأنئ کونگی
برنگی ہند آب کُس کھالہ  سیکلین
رسل میر ہے شونگ
بتہِ ہے چُھس وونئ سوریومُت.......!!!
*علی شیداّ*....copied
[15/08, 8:40 PM] Ali Shaida Shaida: *سورملئ تُرچ*
                               *علی شیداّ*
مو ڈھل شامو تام دہ تھکھ ہن
ژأنگئ أچھن ہندئ ونئ ہے زألم
ونئ یم پونپرئ برأنتئ بنتھ یِن
پردن مو دم واوو زیر
دارہ پٹس مو کر کُھت کُھت
دردہ وتن چھم ژھایہ تسنز ونراونے.....
نیم شبو وولہ تامتھ بیہہ
بوز یہ ژھوپِہ ہندِہ یندرک گں گں
ونہ چھم ژانگین تیل..دزِن تاں
خواب چھ ونہ المارین منز
نندرِ چھُ پرارُن.....
موچھِ منز  چھم پن کئژتامتھ ابساونے....
مو پھول صبحو ژیڑ کر تامتھ
سریہ زژن دِو شافُک تھاپھ
ذون تھون تاں گاشہِ گچین تل
چُرگیُش ینہ وزہ ناوکھ آلین
نب چھُ وتاولئ
صحنس منز چُھس لوہ پھیرئ دوژھ ہیتھ
تارکھ چھِم کئژتامتھ ونہِ گنزراونے.... ...
          ..copied..        *علی شیداّ*
[15/08, 8:40 PM] Ali Shaida Shaida: *غزل*
یادے وں چھمنہ اوس دعا کُس قبول گو
شکرے زہ ہجرہ دراو اشیُک مول وصول گو
کتھ آنگنس نہ ژاو ملنگ گامہ ہیتھ مشألئ
پریتھ بامہ آلہِ آلہِ کئرِتھ شامہ ذول گو
سودس دِوان زول منداں آب  زب  پُژاں
ژیونم نہ کأنز پوو یوتاں ژوک تہ مول گو
آسیئ تہ آسہ گانٹھ نژاں سوے یہ پوتئ کھاو
کانژھا  نظر  دیو سا نیبرئ "ہول ہول* گو
یارژ   دپیاتھ  کار چُھ...  تارژ   نبھأوتھے
یارا یہ ونتہ پاسِ خدا کُس اصول   گو
وستر گریوم چون زِہ گالن بہ راکھشس
راکھیش بنیوس پانہ تئرِتھ میئ ترشول گو
بییہ پییہ مے  دأر دنئ یہ تتھے پأٹھئ شامہ پتئ 
شیداّ مدعأے لوس علی دل ملول گو
*علی شیداّ*  copied
[15/08, 8:41 PM] Ali Shaida Shaida: * ذُونہ نندرہ ہُند چُرگیُش *
کتھ چھے ژکہِ حرفن منز
تہ لفظن منز چھ چھرا معنی
بے معنہ سطرن ہنز دلیلہ کتاں
زیو چھے لل کھول کراں
تہ وٹھ چھ منزلئ بأتن تھاپ تھاپ دواں
شونگُہ شونگُہ حرفو........
گنگرارے چھےوژھن أچھن منز خواب وونان
دید چھے براندس پیٹھ پریہ دلیلہِ تونبئ کراں
شام وق چھ لانپہ ترأوئ ترأوئ دوان دوران
کوہ قاف چیو وتو 
شامُرن ووہ نأوِتھ...
چُرگیش اژِہ وونئ آلین 
دید ووتھِ تھود تہ دیہ نبس کُن نظر
شامہ تارکھ ونراوِہ
ادہ اژہ اندر
اڑہ ؤژھ دأر ملہ شیشس فرستہ اسُن
چُرگیش آسہ أچھ ٹٹوار موچھ منز رٹِتھ 
پریہ پراران زِہ دیون ما نیہِ 
ژأنگئ گاش ژھٹہ توسہ رنگ
یندر ہییہِ گں گں کرُن
پریہ دلیلہ ہند ستہ سوس پن کڈہ کاڈ...
*علی شیداّ* copied
[15/08, 8:41 PM] Ali Shaida Shaida: *نِلہ وٹھ*
سُہ اوس مے أنہ منزئ وچھاں
مُدأے  گنڈِتھ
شاید..... زِہ پریزناویم
وچھس سیتئ رٹیم
تہ شٹھیمتس عکسہ بدنس پھیرم وشنیر
بہ اوسُس خاموش
بہ کتھ پأٹھئ ونہس
زِہ بہ چھُس
پانس وچھئ وچھئ
وٹسئ گومت..................!!!!
*علی شیداّ*  copied
[15/08, 8:41 PM] Ali Shaida Shaida: *غزل*
بے پھروک نژان وچھم زنتہ واو آبس تل
تُلاں چھ  تاپہ ٹیکن  تاں  ستاو آبس تل
دُہل چُھ گریشمہ چڑاں شب ملاں شُہل شبنم 
رِہُل   چُھ  شوق   الاون  جلاو  آبس تل
ہوا چُھ سونتہ لنجن پیٹھ رہتئ گومت دم پھٹئ
کتھل  مزاج  یہ  موسم   بساو  آبس تل
بُبر تہ کھوت نہ بٹھس کُن لجی نہ گراے کہنئ
غبار    میانہ   وجودُک   نژاو     آبس تل
ہُمو وڑوو پکھن پیٹھ چھوکُکھ سیکلئ صحرا
یمو   بسوو   حیاتُک     تلاو      آبس تل
ہوا تہ اوس فُکاں میژ تہ ریہہ تہِ آس وپھاں
تیونگل رچایہ موچھن منز گِنزاو آبس تل
دہِکئ  پُزأرئ چھ شیداّ  کزل ونکئ  موکل
ژے یُس تہِ میلہ ورُق چھُے چھُپاو آبس تل
*علی شیداّ*  copied
[15/08, 8:41 PM] Ali Shaida Shaida: *پھاگنئ گامکئ خواب*
لوہ چھا دژمژ روتلئ زادو
شِنہ ژھٹہِ تیلاں سڑکن تیل
ژھوپ دوپ گاشُک پدئ پراکش ہیو
پریوہ  لوژراواں گٹہ زلئ بور
کُنہ کانہہ چھنہ زن
آلو کرِہے.......
میتہِ زن لجمژ تالس  زیو
أسئ ما لگمتئ پھاگنئ گامس 
أنئ خوابن ہندئ زرئ تعبیر
کلئ اچھرن ہندئ معنے ژھاران
شنیاہ پہرین تروپرتھ بر
دارین پیٹھ چھنہ ژأنگی دزونئ
وتہِ وتہِ رأمتئ وتہ آکار................!
*علی شیداّ*  copied
[15/08, 8:41 PM] Ali Shaida Shaida: *غزل*
دردہ   گامکئ  دردہ   آلو  کریکہ نادن   ہنز   دلیل
ہردہ  ززرکئ  جامہ  لآگِتھ  نر تہ مادن  ہنز   دلیل
باشہ   لاجیم  والہ  واشے  داش  دیُتمکھ     شامرُن
گاشہ پردن  ژھایہ  لیچھِم   خواب زادن ہنز  دلیل
اکھ کشپ ریوش شامہ ژھمرین کالہ اوبرک شاپھ دتھ
ڈل  شکارے  بوزہ  ناواں  سندھ بادن  ہنز   دلیل
میأنئ پأٹھین زالئ دتھ سیکلہن چڑاں گرشمکئ سراب
میأنئ  پأٹھی زنتہ  ژھاراں  ناگرادن   ہنز   دلیل
از تہِ المارین اندر چھم پریہ ونہ وُن ہیو گژھاں
کتھ نہ شیلفس از تہ پھیراں شاہزادن ہنز دلیل
شام سپداں یام تامتھ اتھرہ لد چُھس پن تُلان
ماگہ رأژن  منز  بہ  ووناں  ہاڑہ  یادن   ہنز   دلیل
یتھ ونس شیداّ  یتھے چھا  یارِہ  گہلین منز  سرود
یتھ ونس منز سأنئ ریشئ مس چأو سادن ہنز دلیل
*علی شیداّ*
[15/08, 8:41 PM] Ali Shaida Shaida: خألئ ہلم تہ خواب چھم صبح بخیر صاحبہ
خواب تہِ لاجواب چھم صبح بخیر صاحبہ
چشمہ تُجتھ تہ گاش پھول رأژ گٹن خمار ژول
نورہ برنزیو ولاس وول صبح بخیر صاحبہ
زنتہ  گمان  وصلکُے    زنتہ  یقین  اصلکُے
حال تہ پوشہ  فصلکُے  صبح بخیر   صاحبہ
کیف  تہ  مشکبار زن  حیف  اوشِس تہ دار زن
یار  تہ جأنئ  یار  زن   صبح   بخیر  صاحبہ
چون جبین ماہتاب  چون یہ روے آفتاب
روخ ژے بہشتکی  گلاب صبح بخیر صاحبہ
یأگئ زلف زِہ اوبرہ نب سایہ شُہل گُہل سبب
نأگئ ہیمالہِ چھوو شب صبح بخیر صاحبہ
چھوو تہ شبنمن سرہُل توو یخن تہ زن رِہُل
دودسہ وٹھو تہ چو گُتل صبح بخیر صاحبہ
نجدہ متیُن خیال چھکھ سجدہ ہتیُن سوال چھکھ
لألئ ژہ لا مثال چھکھ صبح بخیر صاحبہ
ذون نژایہ دارِہ تل ہکچہ کرِتھ تہ گئے سونزل
نندرِہ زولن نہ گوے خلل صبح بخیر صاحبہ
دأدئ شلکئ تہ ما بلی پوش دلکئ تہ ما پھلی
بألئ بدن تہ  ما  رلی    صبح بخیر  صاحبہ
شاف أچھن تہ تارکن واف غمک تہ مارکن
واو پژاں تہ یارِ کن      صبح بخیر صاحبہ
شوق شُہل قیاس ہیو رأژ گُہل اُداس ہیو
خوف تہ آس پاس ہیو صبح بخیر صاحبہ
پرأنئ تہ کترہ بانہ کینہہ خرقہ چندس تہ آنہ کینہہ
رایہ ژھریئ شبانہ کینہہ صبح بخیر صاحبہ
پردہ کٹھس نہ کانہہ الاں ژأنگئ لئین نہ ریہہ ہماں
روت ملک نہ کانہہ پکاں صبح بخیر صاحبہ
نارہ کُہلئ تہ شینہ کوہ ماگھ نیبرئ تہ أندرہ پوہ
کوہ چھ کڈن پیوان یہ دوہ  صبح بخیر صاحبہ
ذون وچھتھ ژے لئج درس دودسہ لوگس تہ پئھٹ سرس
چونہ گہان گرئ گرس صبح بخیر صاحبہ
نافہ ژھٹان چھی زُلف تابہ أچھن ژھیناں قُلف
یأگئ اوبُر گنداں تُرُپھ صبح بخیر صاحبہ
کاڈ کوڈتھ تہ سونتھ پھول تازہ ہواوہ  سینہ بول
ماگہ وتن تہِ شین گول صبح بخیر صاحبہ
باغہ بلس انار چھی چشمہ گنڈتھ بیمار چھی
راز تہِ اشتہار چھی صبح بخیر صاحبہ
سروہ نمان چھی قدس شاف بہاں حدس حدس
ہوش ڈلاں چھ سرمدس صبح بخیر صاحبہ
ٹورئ وٹھن اسُن پھولن جود پھراں چھ بلبلن
پریو چھ بریہان سنبلن صبح بخیر صاحبہ
ناگہ ببر ژے آورتھ پریہ ونس عطر ملتھ
سونزلہ کنن کتھا کئرتھ صبح بخیر صاحبہ
[15/08, 8:41 PM] Ali Shaida Shaida: *غزل*
دِلس بدس نہ قرارے  نہ چشمہ خواب  سُواں
بہ چھس وں پانہ تہ پانس  پرژھاں بہ کیازہ زُواں
ہلم تہ رود مے خألی گلاب پھول نہ کہنئ
ژلاں چھ سونتھ تہِ آنگنئ مِترئ روان رُواں
بہ چھس یہ چاک دِواں یُتھ زہ لولہ نار ہمیم
یہ کُس چھ چانہ قبیلک یواں تہ نال سُواں
ژولا سُہ ذونہ کرِتھ گوٹ شبانہ کتکس منز
سُہ نے تہِ خوآبئ یوانے بہ نے تہِ آچھ وں ٹُواں
تمس چھے ہأل یہ روشُن  برنزس اندر توشُن
سو از تہ آسہ مے آنس وچھتھ اساں تہ ژُواں
کزُل تہ ماگھ وں شیدا أچھن ژے شٹھراوی
توے چُھ خوابہ ززُر تاں یہ ہردہ واو ڈُواں
*علی شیداّ* copied
[15/08, 8:41 PM] Ali Shaida Shaida: *غزل*
از  تہ  آلو  دردہ  صحراوکئ  گژھاں   بعضے  کنن
آسہ کانہہ مجنؤن پھیراں ستھ کوہستاں پتھ ونن
بِر بَتن  وقتچ  نہ پانس سیتئ  نژناواں   چھِ کس
آولنئ  تھکروونس أٹئ أٹئ کورس ستہ رنگئ پنن
وُلئ گمتئ چشمن تہ پشپاں قطرہ قرے اوش رِہُل
چھم فراقن چأنئ کورمت شینہ وَچھ ووہونئ منن
سریہ چھنہ کھسنے نبس پرہا بہ گاشکئ کلئ أچھر
رأژ   منز   ما   لیچھمژ   تأریخ    سأنی    کلہنن
گردہ ہند سوغات ہیتھ اوسے ملنگ بعضے  یواں
دونئ  زألتھ سور کُس ہلمس  بریونے برہمنن
چانہِ ویسہ  تے یار میأنی چھأوِتن  وصلک  بہار
ہجرہ بُزئ کرئ تن خدا چانین تہ میانین دشمنن
بییہ تہِ کم پُنئ پاپ آسی یاد پیکھ شیداّ   لُکن
ژے امر کورنکھ تہ پننی دردہ  ہتئ شعرکئ  فنن
*علی شیداّ*..copied
[15/08, 8:41 PM] Ali Shaida Shaida: *غزل*
چھئژ ونلہِ گأمئ گام وچھم  آورِتھ تھومت
یمئ دأر تہ ہومئ تور   تہ دروازہ دِتھ تھومت
بوزم  پگہ چھ  آب  مندُن  دردہ  بونہ تل
ییمئ اون ازی بہانہ تہ ہومئ راتھ نِتھ تھومت
تمئ اوس والہ واش تھومت آشہ منز أچھن
تمہِ اوس دپٹہ لونچہ گنڈتھ شالہ ہِتھ تھومت
کھسہ ہے تہِ آفتاب پگہ لوسہ ہے تہ دوہ
کالے تہ کیازہ تازہ غمن  سون یِتھ تھومت
یمہ جایہ شام تام ڈولے ما تہ واوہ موت
دل اوس یا تہ کأنسہ یتیتھ ما دزِتھ تھومت
 
از نئے تہ کألئ واتہِ  یہ چھے خام خیألی
شیدا ژے کیازہ  پان  پنُن  آلوِتھ  تھومت
*علی شیداّ*
[15/08, 8:41 PM] Ali Shaida Shaida: *غزل*
شہر چھ پریون یہ تاپُک  کزلئ  قلاے گنڈتھ
میژے نہ  میانِہ وجودچ  دراں سراے گنڈتھ
دوکھن مہ حال سنے ون چھوکن تہِ کرألئ ووتھاں
مژی  رُمالہ تِتھے کنئ  چھیا  ژے ماے گنڈتھ
سُہ کتھ نہ دارِ وں درچس پھیشل وُنل شأپٹھ
چھ  کتھ نہ از  تہ  مکانس  برس بلاے گنڈتھ
دوہے چھ میانہ پشُک کانہہ ژھرٹو مراں کوتر
یہ کُس چھ ژھایہ دیوارس شکأرئ آے گنڈتھ
کوکألئ  واو  یہ  برادیو  سوکألئ  تاپہ  وتن
پکاں چھ یُس تہ مسافر پکاں چھ ژھاے گنڈتھ
پریژل چھ خواب ونیامے رچھاں چھ آنہ گُہل
دلس تِہ لأرئ تیونگل چھم أچھن تہ لاے گنڈتھ
کوتام  نجدہ  ونس  منز  نژکھ علی شیداّ
سفر چھ وریہ بدین ہند قدم چھ ڈھاے گنڈتھ
*علی شیداّ*    copied
[15/08, 8:41 PM] Ali Shaida Shaida: *غزل*
شاید چُھ کراں سونتہ ہوا دارِ مے  ٹُھک ٹُھک
ہیتھ آسہ سبز خواب ونُس تور چھُ.. رُک رُک
فلحال  یمے ماگہ شبن ہندئ چھ  تُرنئ.. زال
رٹھ خواب أچھن منز ژہ تیونگل دار تہ پھُک پھُک
یمہ طرفہ چھ پریتھ کال ولِتھ نال صفر ہیو
ہومہ طرفہ بساں لوکھ کُنِس ژھایہ ژہ جُھک جُھک
سوے ژأنگئ لئیا آسہِ ہوا خرئ فہ گنداں ییتھ
بے  آسہ  شبس  میانہ اشیُک آسہ تہ  بُک بکُ
اکھ سُے تہ مے کُن زنتہ اتھکئ پأز ہلاوان 
اکھ میون مسافر  تہ   سفر   ریل تہ چُھک چُھک'
تتھ بریمجہ کُلس پیٹھ چھ گیواں از تہ ککو میون
کمئ تام  وونُم  بوز  کنو  راتھ  مے  کُک کُک
یلہ آو مے تھوئ گاشہ اچھر آشہ کٹھس ژأنگئ
شیداّ سُہ ڑٹتھ دراو وں سونبراو تہ ٹُک ٹُک
*علی شیداّ*
[15/08, 8:41 PM] Ali Shaida Shaida: *غزل*
بے سوکھ چُھ میانہ وجودُک صدا قرار لبِن
وٹھو چھ قید یہ کورمت دعا فرار گژھِن
بہ دراس گردِ پدین ہندئ أدرئ ذولانہ  ژٹِتھ 
مے ستئ غبارہ فقط وونئ ہوا سوار پکِن
یمن چھ برأنتئ گژھاں بلئ چھکھے نہ آنہ بدس
عکسئ شہن چھ گنداں کیا اکھا مزار وسِن
دوہے چِھ شامہ ڈلِتھ ہیو  تیونگل أچھو پشپاں
یِنا   ژہ  آب   دِکھے  از  شبا  یہ  نار  دزِن
ہرُد   تہِ ژھایہ  چھُ  برگن  ززُر  کتاں  ہاوے
تلا   ژہ   پرار  کُلین  وچھ  ہنا  بہار   چھنِن
نظر چھے میأنئ یہ ازلے اوارہ لوسہِ نبس
وچُھس تماشہ ژہ تارکھ  ہتھا  شمار کرِن
سمو تہ از نہ پگاہ اسئ کتھن نہ پن زِہ تُلو
وچھو سو حال تہ شیداّ متیا غبار ژلِن
*علی شیداّ*
[15/08, 8:41 PM] Ali Shaida Shaida: پتہ ڈلہ شام 
راتھ اژہ پہرہ منز
تہ دیہ دانس انہ گٹئ ژکھ 
خواب ہین  ژارین منز دزُن
تینبرہ گژھن گڑونجس الانز 
سور نیرہ صبحے آنگنس منز
تتھ شہلاوین شبنم پھیرئ بدن
تاپھ آسہ روتلئ دودسن
ہلکأرئ کورمت
ژھاے وسہ براندہ 
تہ شام تام تلہ پننس آکارس مینژ
مے ونیومس کژہ لٹہ
مگر راد تہ ہونزہ چھس پتے
اوش پشپیوو پشہِ
نتہ کمئ دیت اوکژارین آب
اوش پھیرین پھش پھش دوان وونن
نارس دما نرہ........................!!!
[15/08, 8:41 PM] Ali Shaida Shaida: *غزل*
گاشہ کیمیو  زألئ  پننئ دارِ تلکئ ژأنگئ مے کیاہ
شاف ولِتھ بیٹھئ ژھلکئ میانہ ولکئ ژأنگئ مے کیاہ
یا تہ ڈلس چھأوئ وچھس ذونہِ دزن داغ پننئ
یا تہ أچھو کھألئ نبس جھیلِ ڈلکی ژأنگئ مے کیاہ
گردِ کھیومت بیول غمُک زاو پھلِس پوش رہلئ  
از تہ چیواں قطرہ تمی یأگئ  پھلکئ ژأنگئ مے کیاہ
نجدہ ونس اوس موتا میون کراں سجدہ   روو 
لیلہ ژھیواں رودئ دوہے یارہ بلکئ ژأنگئ مے کیاہ
پردہ کرین واش ودین زردِہ  کُٹھین گاش ژہ وچھ 
ہردہ  ززُر آیہ وٹِتھ  دردہ کھلکئ  ژأنگئ مے کیاہ
رام تہ شیداّ مے کئرِم خام  دُہکئ  پأز مگر
شامہ پشو أسئ وپھاں بوندقہ شلکئ ژأنگئ مے کیاہ
*علی شیداّ*
[15/08, 8:41 PM] Ali Shaida Shaida: *ژہ ما آیکھ*
برس نے ٹھک ٹھکے گو کانہہ
نہ لج زیرے سیاہ  پردن
نہ اوژ کانہہ چُرگیشُے درزو
نہ پچ کانہہ واوہ رنگشی دارِ دامنئ
مے اوسم کالہ تھومت نندرہ ہند اکھ
سائباں پننس مکانس پیٹھ
سُہ کمئ تُل.........!!!
کُٹھین ہے گاشہ ورشُن گو
ژہ ما آیکھ......!
ژے ما اوسے صبح برونہہ برونہہ
پدین تل  تاپہ ٹیکئ چھیکراں.........!!!
*علی شیداّ*
[15/08, 8:41 PM] Ali Shaida Shaida: *غزل*
راتھ   سیاہ   کال  جُگنئ دارِ تل نہ کانہہ
طاقہ ژھیوِم گاشہ ووژر یارِ چھل نہ کانہہ
بامہ دژکھ شامہ ڈلتھ کوترن مے چھگ
وُچھ  تہ  تنے  آنگننے  ہارِ بل  نہ  کانہہ
داوہ تہ ستہ سوسہ انیم چھاوِہ کُس مگر
آرِہ  ولتھ  کار  دِتُم  چارِ   ول  نہ   کانہہ
تاج  محل  کیا سہ  گرن  خواب  زاد  یم
یم چھ ژھری لوکھ یمن بارِ پل نہ کانہہ
اوس دہے دہ تہ لیکھاں اوس یم حرف
ٹاسہ تلے دراو تمس مارِہ شل نہ کانہہ
واوہ   ملر    تام     دِواں   تار    بخ   پنُن
آسہ پھُٹن یس وں تمس تارِہ ژھل نہ کانہہ
أندرہ وُزاں ناگ نیبرئ دگنہِ آبہ جوے
چشمہ ژے شیداّ چھ یمن لارِہ مل نہ کانہہ
*علی شیداّ*.....copied
[15/08, 8:41 PM] Ali Shaida Shaida: *غزل*
یمہ ساعتہ پانہ میانہ ژہ پانس کھرکھ مرکھ
نیرین اندر لبکھ نہ مرگ یا نہ رکھ مرکھ
کأژا زمین چھے ژے پدین تل خبر چھیا
بییہ زن زہ ژور دوہ ژہ یتھے کنئ درکھ مرکھ
کُن  پان اکھ  مرکھ تہ لسن یم تمام لوکھ
یُتھنا  کُنیر  اگادہ  گژھی کُن سرکھ مرکھ
فلحال چھے ژے باز بدس خانہ خانہ گِند
پننیو رکھو اپور  دنِتھ دول  ترکھ مرکھ
پونپرئ ؤپھل تہ یأگئ نہ سمیکئ  موچھین یِنے
زخمن تلکھ ژہ کرألئ تہ ارسر کرکھ مرکھ
پتہ کیاہ کرکھ وجارہ گومت آسہ وصلہ کال
یم میأنئ ہجرہ زاد غزل ہے پرکھ مرکھ
بدنس ژوپأرئ ولئ ژے گمتئ سرنئ تہ گاش دار
کوتاہ اچھو کڈکھ تہ یمن اوش برکھ مرکھ
شیداّ یہ برگہ کال أچھن دراو کس تہ پھریوس
سمکھی ہرُد پگہہ تہ  سبز پن  ہرکھ  مرکھ
*علی شیداّ*..........copied
[15/08, 8:41 PM] Ali Shaida Shaida: *غزل*
بے سوکھ  چُھ  میانہ  وجودُک  صدا  قرار لبِن
وٹھو  چھ  قید  یہ  کورمت   دعا   فرار  گژھِن
بہ دراس گردِ پدین ہنز أدرئ  أدر طناب ژٹِتھ 
مے ستئ   غبارہ   فقط   وونئ  ہوا   سوار   پکِن
یمن چھ برأنتئ گژھاں بلئ چھکھے نہ آنہ بدس
عکسئ شہن   چھ  گنداں  یم   اکھا  مزار  وسِن
دوہے چِھ شامہ ڈلِتھ ہیو  تیونگَل أچھو پشپاں
یِنا   ژہ   آب   دِکھے   از    شبا   یہ  نار  دزِن
ہرُد  تہِ ژھایہ  چھُ  برگن ززُر  کتاں  ہاوے
تلا   ژہ   پرار  کُلین  تل  ہنا   بہار   چھنِن
نظر چھے میأنئ   یہ  ازلے اوارہ  لوسہِ نبس
وچُھس   تماشہ  ژہ  تارکھ   لچھا   شمار  کرِن
سمو  تہ  از نہ  پگاہ  اسئ کتھن نہ پن  زِہ تُلو
وچھو سو   حال   تہ   شیداّ   متیا    غبار   ژلِن
*علی شیداّ*....copied
[15/08, 8:41 PM] Ali Shaida Shaida: *ژھایہ گُہل*
سونہ مالہِ چھم ژھاے گمژ
زنگأرئ ٹوپل بونبرن ہنز
ذونہ روخن چھس ززُرئ گرہن لوگمت
وٹھن مولمت تارکھ ژین چھنتھ پیوان
روپہ ون کُس گژھِ
ژندنئ لئش انہ ہے
بُرزہ ونک ملنگ تیئ بیوٹھ ژھیپھ دِتھ
زنتہ گوپھ بل غارس منز
اسبندئ گامُک موت تہ ما آوے
ببرہ پوشی انہ ہے موچھ منز
سونہ مال چھے وچھِ کتُر کران
کوچھ منز ننُدہ رٹِتھ
للہ.ہنزِہ پُژہ تل
کرہنین ژھاین درہ درہ کران
رشہ مألِس لایان ناد
سبز رُمالن ہند استاں ژھاراں
اوش پھیرئ ہاراں....................!!!
*علی شیداّ*
[15/08, 8:41 PM] Ali Shaida Shaida: *غزل*
ژھأنڈان  بہ کیا   زنتہ کتابے نہ أچھن منز
سیود سادہ ورق جورئ نصابے نہ أچھن منز
واوس چھُ  ولاں گردہ بورت گرشمہ سیکلئ زاد
صحراوہ  دُچا  بارِ  سرآبے نہ  أچھن   منز
گرینز تل چھ گژھاں گاشہ ٹیکن پھیرہ تہ بعضے
یا سُے نہ یواں نظرہ مے  یا بے نہ أچھن منز
چھم برأنتئ تُلاں جیرہ نِواں ژھایہ ڈُہِتھ چھم
آنن چھ گژھاں چورہ  حسابے نہ أچھن منز
یتھ آسئ پھولاں پوش کھساں بوے عرش تام
سُے ناگ ژھوکیو راتھ وں آبے نہ أچھن منز
پریتھ کأنسہ پننئ لار  پدین واو نکھن پیٹھ
سمکُھن نہ سوالے نہ جوابے نہ أچھن منز
شیدا سُہ ژیوہا آو تہ مس نندرہ پھرتھ گوم
یم  چشمہ عزادار وں خوابے نہ أچھن منز
*علی شیداّ*..copied
[15/08, 8:41 PM] Ali Shaida Shaida: *ذون لجمژ أچھن*
دوپمس...
ذون دمنے بلایہ
ذونہِ چھِ تارکھ ونچہ پریہ گاشہ ناگہ  تن ناوان
تہ چھتئ تپہ ریشئ پرینہ اوبرہ ڈولہ منز نیلِس اوچھئ ذوِس سیر کرناوان
سورگہ جوین ہنز مانچھ تریش چاوان
بہشتہ باغکئ مدرئ دچھ کھیاوان
تہ پتہ سوکھ سئرئ پریژل پہرہ منز
اسمأنئ رنگہ نظرہ پینجہ پیٹھ ساوان...
دوپُن.....
نہ..چانہ آنگن وارِ ہنز کاژہ نیلئ ہند تہ داں ڈلک مشکہ بدج بتے کھیمہ ہا
چانین ببرہ کلین ہیمہ ہا مشک
 تہ
چأنس وچھس پیٹھ تراو ہا  کلہ
چانہ اسبندئ گامکئ سونہرئ وصلہ خواب  کرہکھ تعبیرہ ذُوین منز آباد......!
تنہ چُھس پریتھ ذونہ شبس
براندس پیٹھ نیرتھ
تہنزی برأنژ ذونہ مدعاے گنڈتھ وچھان
تنہ چھنہ بییہ کانہہ ذون
مانین نظرن سمکھاں
تنہ چھم سوے 
ذون
زنتہ أچھن لجمژ ....................!!!
[15/08, 8:41 PM] Ali Shaida Shaida: *غزل*
بریہاں چھ ژأنگئ أچھن یام چُھس غزل لیکھان
بدل لیکھاں تہِ  مگر   ما    ادل بدل لیکھان
بہ چھُس غبار ونن ہُند چڑتھ کڈاں دریاو
بہ چھس نہ آرہ بٹھین  پیٹھ کدل ودل لیکھان
وچھان ذون تہ تارکھ  گراں ژہ خواب شبکئ
نبس بہ شامہ برونہئ چُھس ڈیکس ازل لیکھان
چُھسے گلاب تھرین پرژھ کنڈین جراں شبنم
ژہ چھکھ مے تاپہ ٹیکین تاں تہ آرہ پل لیکھان
ڈولُے ژے واو تہ پوکھرین پسِتھ یواں پوس چُھے
مے از تہ ناگ چِھ اچھ ول کنین موغل لیکھان
ژے چُھے نہ آب أچھن منز ژہ کیا پرکھ صحراو
بہ چھُس نہ گردِ  وتن پیٹھ ہوا  سہل لیکھان
ژے چُھے تہ شور فسانُک چھنِتھ پیواں قلمس
بہ چُھس نہ بالہ وچھس منز گوپھن خلل لیکھان
حرف رلان تہ خوشبو لفظ ژھٹاں شیداّ
ہزج پران  ژہ  بوزاں رجز '  رمل لیکھاں
*علی شیداّ*....copied
[15/08, 8:41 PM] Ali Shaida Shaida: *غزل*
مونم زِ بشر دراس پھورم شوق  گئیم بھول
ہورم تِہ  أچھو خون ازیُک تام وساں چھول
ازتام  فقط  شور  ژھوپن  ہُند مے کنو بوز
از تام کجر  رود کتھن میون   دِواں طول
ذولانہ  گوڈن  طوقِ  غُلأمی  تہ   ہٹِس  نألئ
کھنڈرات لرین توتہ کراں چُھس بہ دوہے زول
نرکأنئ  قلم  راوئ  ونن   برزہ  کُلی  غأب
گُلریز  لیکھن  والہ  پورُتھ  سود گولُے مول
ہرگہہ یہ  مژر   لوس  وتی گردِ  بُزی گوم
ہرگاہ یہ سبز خواب پگہہ دراو ووزُل نیول
خط اوس کسند کمئ سُہ انیایاو چُھ کس یاد
المارِ    منزے   رود  لفافے   نہ   زہنئ   کھول
مژروو پنن کُل مے ؤتھر پوش کنڈیو سان
أنزروو مے کُس نیاے نیبرئ دیل نہ أندرئ گول
یا گو نہ وچھاں چھکھ ژہ نژاں گانٹہ چھ اسمأنئ
یا گو نہ کنن چھے ژے گژھاں   ہول پتے ہول
أچھ پُتنہ کراں چُھس بہ شبس سادہ ورق میأنئ
کیا لیکھ ڈیکس چُھم نہ تگاں بس بہ دِواں رول
چھُس گاہ بے گاہ زول دواں خوابہ سرابن
بے کار ذہن روزِ تہ سوچس چھ ووتھاں ترول
شارت یہ غمک سوز  تِہ  شیداّ  چُھ بحر بند
سازت چھ مفاعیل تہ پازیب چُھ مفعول
*علی شیداّ*......copied
[15/08, 8:41 PM] Ali Shaida Shaida: *غزل*
خبر  کوتام  وچُھن چُھم  أچھو  زوال   پنُن
وچھس تچھان چھُ زخمن  مِترئ سوال پنُن
دلچ ونل چھ دزاں ہِش رِہُلئ زِہ خواب شبکئ
سیکلئ رُمالہ ولِتھ چُھم سرہُل خیال پنُن
نیبرئ چھ واو بدل ہیو ضرب دواں پہرین
أندرئ چھ مأج وچھس تل رٹِتھ عیال پنٰن
چھُ کیُتھ عجیب شہر وچھ کہنئ نہ زنتہ موکُل
کمِس نہ بارِہ آچھن پیٹھ ژھورے ملال پنُن
قُمیر نہ  ہأر  نہ بلبل ..گُہل چھُ  کاون   ہُند
وجارہ  کیازہ  ژے  آنگُن  ولو  سنبھال   پنُن
محرّمک  بہ وچھاں چُھس دوہے ژندر شامس
مے وچھنہ عید  مناواں  زہنئ  شوال پنُن
ولُن  پیوان  چھ  پانے  کفن   غمن  شیدا
ونُن  تہ ما  چھ  بناں از  بنُن  تہ حال  پنُن
*علی شیداّ*....copied
[15/08, 8:41 PM] Ali Shaida Shaida: *غزل*
گہا چھُ ژھایہ  بِہتھ  ہیو  لوتی کتاں انہ گوٹ
تُلاں نظر بہ یتُھے چُھس أچھن متاں انہ گوٹ
سیاہ   پھیلہِ   محیطن   تمام   گاش  ژھوکین
ژوپأرئ آسہ گوٹے گوٹ ژہ تاں  بہ تاں انہ گوٹ
کھساں چھِ ژأنگئ لئین پیٹھ تیونگل تہ ہاڑ شٹھاں
بریہاں چُھ ماگہ وچھس منز ہوندر تتاں انہ گوٹ
حرف چھِ  پرأنئ  ورق  ہیتھ اسی کُنتھ دوراں
تَھوَکھ ژہ چشمہ ہُشارے کرکھ نَہ تاں انہ گوٹ
تمِس  چھُ   از  تہِ  سراپا   کزُل  گہاں   شیداّ
ژے ما سأ یارہ وچھتھ زانہہ تمس چھتاں انہ گوٹ
*علی شیداّ*...copied
[15/08, 8:41 PM] Ali Shaida Shaida: *غزل*
دوا چھ أنِتھ کس کیت  دعا چھ کرتھ کس کیت
خدایہ غمو مورس اُپاے مرِتھ کس کیت
نظارہ أچھن کأتیا ....شمار  کرُن مشکل
غبار دِلک سیژل چھ نار برِتھ کس کیُت
مرازہ   رُسل میرَن  شراب  نٹیو   بأگُر
ہُہ تازہ نژن واجینئ چھے ساز کرتھ کس کیُت
کھیأے کپس اونٹن ژچاے تہ نس دونِس
سوال لیکھتھ کمئ سند جواب پرتھ کس کیت
نہ پھیور بمُن سونتک نہ سور ززُر ہردُک
چھ ہارِ نکھے بلبل مے دار مرتھ کس کیت
شنأبئ شبکئ تریشل سراب أچھن برئ بری
شباب وُپھل شوقس گیاو پھرتھ کس کیت
زوالہ کھوٹتھ  أخر  شوالہ ژندر  میونے
مے رود أچھن اندرے  صیام درتھ کس کیت
نہ عشقِ ایازے کانہہ نہ زلفِ غلامے رُت
عیاش طبیعت چھُم پیوان ہرِتھ کس کیُت
رزیلہ  جِنن  ژجمژ  دلیل  مے   کَن  دأرتھ
سُہ پیالہ اگر تمئ چیو یہ پیالہ بئرِتھ کس کیُت
کمال کرُن اوسس   زوال پھورُس شامُک
جواب کتھن آوُر سوال سرِتھ کس کیُت 
صنعت اعداد
شے پاش تھوِم تروپرتھ زہ گاش وچھم  یکجا
چھ گاش اکے غارس ترے یار کرتھ کس کیُت
چھ  بام  نَوَن   پورن  حصار ستن دیشن
تہ آب رِہُل واوس مکانہ جَرِتھ کس کیت
چھ پانژھ رٹتھ تسبیع رکوع رلتھ سجدس
اذان چھ ژون طرفن قیام درِتھ کس کیُت
نہ ترین تہ  نہ تُروہن منز دہن تہ کہن بانبر
یپارِ طلاطم  ہیو  اپارِ  ترِتھ کس کیُت
بچارہ   تُلِتھ  کلہن   بلایہ  دِتُکھ  شیداّ
زمانہ اوے دم پھٹئ فسانہ گرِتھ کس کیت
*علی شیداّ*...copied
[15/08, 8:41 PM] Ali Shaida Shaida: *ژھانپھ*
بہ کیا سنا
یہ کن فکاں تہ ہو تہ ہا
کُنے دعا کنے گواہ تہ لا بہ لا
بہ آش ہیو کہ تراش ہیو ونل ونل تہ گاش ہیو
سبز تھرین گنداں ہوا ززرئ وتھر تہ گردِ بزئ بہ لاش ہیو
گرتھ ژرتھ نصیب کانہہ فلک وسِتھ مے دامنس جراں چھ تن ستارہ کانہہ
ازل بہ چھُس ابد تہِ چھُس بہ وزملا کہ تاپہ پریو سیاہ چہس اندر ذواں کِہنئ نہ چُھس
*علی شیداّ*   copied
[15/08, 8:41 PM] Ali Shaida Shaida: *ژے ما پے*
محبت
ژے ما پے تہ کیا گو
أچھن ہند وتن پیٹھ گِندُن ما
وچھس تل گژھن پونپرین ہند نژُن ما
دزُن ما شمع ہیو تیونگل ہیو  تتُر ہیو ووتھُن ما
اوچھئ خواب ما أچھ وژھن ہُند تہ ہجرُک نہ ڈلہ وُن دوکُن ما
بہ کتھ دردہ گامس مسافیر لوگمُت مے خیرات کُس دی ژے ما پے
*علی شیداّ*....copied
[15/08, 8:41 PM] Ali Shaida Shaida: *اوم بانہ*
یارس
تس بے عارس
مسول کوت تاں پرارس
ژھین چھنہ ودنس دین کیو راتس
دوکھہ لد دل چھنہ سنبلُن ماناں ساعتس
کمرس منز چھم.نجدک ددئ ون سجدس سجدس
سیکہ وہراوچ ووہونئ ژادر وتھرتھ تراوتھ ساواں.......
*علی شیداّ*   Copied..
[15/08, 8:41 PM] Ali Shaida Shaida: *غزل*
وتن  پننین   پکاں   پننے  سفر   ہیتھ
ہجن سڑکن بہ چُھس دوراں سیزر  ہیتھ
بے سوکھ بانبر میسر کیا وپھل برنزئ
رچھاں تاپُل بہ  کُستامتھ  گچر ہیتھ
بہ  اوسس دأر   مژرِتھ   نظرِ   کستام
خبر کُس پوک تہ ژول میأنی نظر ہیتھ
گژھاں یُس بالہ بُزئ شامن  تہ راواں
کھساں سُے سریہِ پاتالک سحر ہیتھ
ٹھکانا  وقتکِس  رازس  دپاں   اوس
مکانا   خستہ گومت  دارِ  بر   ہیتھ
مولئ آنگن جئرتھ  شبنمئ  پھیریو چھم
کھسکھنا  گام کُن دودسل شہر ہیتھ
 یہ کوس لیلا  کراں چھم ویہہ مے نجدس
نژاں شیداّ بہ کُس مجنوں  مژر ہیتھ
*علی شیداّ*...copied
[15/08, 8:41 PM] Ali Shaida Shaida: تصویر تہ نظم......
*چھگ*
خوابہ زچین منز شونگمُت گام
دوکھہ آبس تل
( زنتہ ستی سر)
آبس پیٹھ اکھ سونہرئ  گاڑ
دودسل سمیُک
وٹھ سریہناواں
( زنتہ چھ لل دید)
ونہ ووتھ جوگیا
دردہ کُلس تل
سور أچھن منز
ذُنہ گاہ زِتنیل  زألتھ دونئ
(زنتہ کشپ ریوش)
ژھییہ پہرین منز
کاغذ ورقن 
کتھ گرئ دوہ ہیو
رکھہ آکارن رنگ پشراون
(زنتہ چھ کلہن)
منہ گوپھِ درامُت
گاشرئ بوک ہیتھ
گچہ وتہِ شیران
صبحکئ پرتو
سونہ صحراوک گردِ ملنگا
(زنتہ چھُ نند ریوش)
گٹہ زلئ اوبرک
واوہ پکھل اکھ
کاون رونگمُت شامہ ژھمبرئ ہیو
(زنتہ چُھ موکل)
ریزل نظرو
بوچھ ہوت ندہر.......
(زنتہ چھ ژھوپ دوپ)
ونئ گژھِ چھگ..............!!!!
*علی شیدا*  copied
[15/08, 8:41 PM] Ali Shaida Shaida: **غزل
عکساو پنن أنہ تعارف تہ کرکھنا
اظہارأچھو شوخ وٹھو گف تہ کرکھنا
بے کار کوتاں روزِ یہ جدول تہ یہ ابجد
دون نے ژہ کرکھ طاق کُنِس جُف تہ کرکھنا
چھتئ دگرہ اوبُر ژھایہ تھووکھ تاپہ برگ رأوئ
اے میانہ مولئ خوابہ ژھورُے تُف تہ کرکھنا
ییئ کارِ محبت چھُ تصرُّف نہ کرکھ یود
سرتازہ گُمانُک ژہ مے تصرُف تہ کرکھنا
دن روٹہ اشکئ قطرہ مے دِم تشنہ وٹھن سریہہ
ہے   میانہ  عزا  دارہ   تکلُف   تہ  کرکھنا
کُس اکھ نہ گماں چون ہیواں باج غمن بألئ
کُنہ ساعتہ نظر سادہ ژھرے مُف تہ کرکھنا
شیداّ چھ چیواں زہرِ غمک روز سمندر
رأہی چھ دپاں پیالہ چیکھا اُف تہ کرکھنا
*علی شیداّ*..copied
[15/08, 8:41 PM] Ali Shaida Shaida: *غزل*
دادِ ذواں رود دوہے وونئ چھ مراں ٹھیک
راتھ اساں اوس غلط  از چُھ وداں ٹھیک
گوش چِھ دواں اوش چِھ چیواں شاندہ تلکئ خواب
راتھ   ڈلاں  ذون  ہراں    سریہ     کھساں  ٹھیک
پردہ  ڈلاں  دردہ  کُٹھین گردہ  گنداں   واو
ہردہ  ززُر   دارِ  بیہاں   ہارِہ   گیواں    ٹھیک
شاندہ سرہلئ خواب شِٹھاں براندہ دزاں ژأنگئ
اندرہ دُہے دوہ چھ نژاں نیبرہ مکاں ٹھیک
یا تہ  کُنے ذون بہ چھونُے یا  تہ  چھونیر  عام
یا تہ چھُ  الغأبہ  وزن   غزلہ گژھاں ٹھیک
حال  غبارک  چھ  گناں  وشفہ  ژھیناں نال
اوش چھ مگر شامہ أچھن جامہ چھلاں ٹھیک
ناز  تُلاں  چأنئ  یہ  شیداّ  چھ  نظر  باز
 باز   دوہے   ہارِہ   مگر   باز  گنداں   ٹھیک
*علی شیداّ*  copied
[15/08, 8:41 PM] Ali Shaida Shaida: *غزل*
أندئ پکھئ بساں چھ جایہ میانہ کم عجیب لوکھ
میئ ہیوئ تمام لوکھ مگر خوش نصیب لوکھ
عینک کورم مے صاف وُچھم دارہ کنئ ژوپأرئ
کم کم امیر  لوکھ  یِمے   زن غریب لوکھ
یم آسئ صبح وشام أچھن ژھایہ گتئ کران
دوریایہ نظرہ کیازہ تِمے تم قریب لوکھ
کتھ چھکھ بیمار ہیتھ ژہ نکھس پیٹھ تہ کم ضماد
یمہ شہرہ ژلئ دکان بڑأوتھ طبیب لوکھ
دوری کراں حساب تِہ  لولس نفع چھ کوت
از کل بیہان چھی نہ أکس اکھ قریب لوکھ
برونہہ کُن زمانہ میلہ پچین خوف  ما  لیکھان
پتھ کُن توے پکان چِھ اکھ اکھ جریب لوکھ
پارے دژکھ تہ دراو ستی سر تُلِتھ  کِتاب
شیداّ پننئ پننئ چھ سجاواں صلیب لوکھ
*علی شیداّ*      copied