افسانہ ناوۤ: آدم ذاد
افسانہ نگار: غلام محمد ماہر
تبصرہ نگار: طارق احمد طارق
................................................................................... تبصر:
تبصرہ نگار:
طارق احمد طارق
زیر تبصرہ افسانہ "آدم ذاد" چھ افسانہ نگارن پننہ آیہ واریاہ معنی سوو بناونٔچ کوشش کٔرمژ. افسانہ نگارن چھ گوڈ تارکن وچھنک منظر تھرمت، پتہ تمن گرند کرنی لآجمژ. پتہ تارکھ اوبر نبس ژھایہ گژھنی. پتہ اکھ تارُک کلہ نون کڈن تہ افسان نگارس <کلیدی کردارس> تنبہ کران زِ "اسہ مہ کر گرند. اسی چھنہ بیون بیون، کانہہ لوکٹ تہ کانہہ بوڈ، اسی چھنہ گاش رایہ رایہ بآگران " وغار.
سوال ہیکو کرتھ زِ تارکھ کیاز کرن محض تمن کن وچھنس پیٹھ امی آیہ وعظ خانی. ونہ اوسنہ افسانک پلاٹ کھُلیومتوی. کیاہ تارکن گرند کرنہ سآتی چھا اینزٔ صلاحژ محدود گژھنک کانہہ تجربہ افسانہ نگارس نش برونہے موجود. میانہ حسابہ چھ. افسانہ گوڈنچے نظرِ منز سپاٹ باسان.
کلیدی کدار چھ تارکس سآتی ہم کلام سپدنٔہ پتہ "فلیش بیکس" منز گژھتھ آدم ذادن ہنزِ خود غرضی، منافقت، تٔہ تہِ ہوند رایہ رایہ نون چاے بآگراونٔکی ضمنی واقہ یاد کران. تہ تارکن ہنزن خصوصیژن مد مقابل آدم ذادن ہنزن کارستانین ہند سِر فاش کران.
... عیذ دوہ چھ اکھ نادار زنان پنہ نس کرایہ در سندی ذریعہ بے گھر یوان کرنہ. محلکی معتبر تہ بارسوخ نفر چھ اتھ واقس متلق کنہ ڈوْل دوان....
افسانہ نگارس چھ کتھے موکلان تہ یہ واقہ اتی ترايتھ حمامس منز پیش ینہ والس بیس واقس ٹوچن کران یتھ منز سہ مسجدِ ہندس پرزڈنٹس مشید ہنز آبہ لآن گھر نینس کُن لوکن ہند ظون پھران چھ مگر لوکھ چھ کلیدی کردارسی وکری گژھان تہ چانٹی گنڈ کران.
افسانہ نگارس چھ یتہ نس وآتتھ شک گژھان زِ شاید چھنہ سہ ہیکان قاریس پننہ نقطہ نظرس متلق وحدت توثر دیتھ. سہ چھ لہذا افسانس منز زبردستی "انشائیک لہجہ" بران. یہ لہجہ کتہ دیِہ افسانہ کس پلاٹس واش کڈنہ. افسانہ نگارن چھ پزنہ پآٹھ کلیدی کردارس "کشمش بہ سماج" درشاونچ کآم مٹہِ تھآو مژ. مگر تمئ چھنہ یہ طیس ہیچمژ واتناوتھ. سہ چھ قاریس اکہ کوہ کھالان تہ بیہ کوہ والان. اتھ تکنیکس برونہہ کنہ چھ افسانہ نگار یہوی بے بس ہیو باسان.
افسانہ کس آخرس کن چھ افسانہ نگارن آدم ذادن ہندی مختلف بُتھی تہ مختلف سمآجی رشتن ہنز بے مائیگی ہنزن کتھن پن تلان. مگر.. یہ سوری چھ انشائیہ کِس. لہجس مبز درآنٹھ گژھان. یتی چھنہ کہانی برونہہ پکان بلکہ چھہ فاصلہ بوزناونچ نہج درآنٹھ گژھان.
افسانہ کس اختتامس پیٹھ چھ افسانہ نگاربیہ غار فطری اندازس منز "کُنس تارکس" مخاطب کرتھ ونان "بہہ لگے اوبرسی ژھایہ، نتہ کنہ نےآدم ذاد کھوٹین پونسن. ".
کُلس پیٹھ چھ، مے نزدیک اتھ افسانس کہانی ہندس ڈھانچس بیہ اکہ پھری ہنا نظر دنچ ضرورتھ.
افسانس منز یتھ جایہ علامتی رنگ ابھران چھ سہ چھ انشائیہ لہجس آویزان. لہذا ہیکو نہ اتھ علامتی افسانک ناو تہ دیتھ.
فسانہ نگار گژھنہ تنگ دل گژھن. تمن چھ افسانہ لیکھنک جان بِتر. خدا دیہ نکھ زورِ قلم بیہ ہن.
وسلم
طارق احمد طارق
رفیع آباد
2/9/2017
